Friday, March 7, 2014

Konkani Kotha: KATARIN - boroupi Norman Noronha


Konkani Kotha:
K A T A R I N

- Boroupi: Norman Noronha        

 
 



Ambulance turns turtle due to drunken driving. Women harassed by drunkard husband, kills 5 children and commit suicide. 37 Killed as bus falls off bridge on Mumbai Goa Highway. Investigations reveal driver was drunk….. 
Hea ani te bhirakul mhatele khobrampotrancher vachun, angachi lhonv ubi zata.   Bebddo Caitan, Bebdo Santu, Bebdo Lores, adi-adi, amchea ganvantlea bebddeank ami volkotale. Oxich, eka bebddachi gozal tumchea somor dovortam.





“Maim, Maim, vegim dhavun yeo ghe”. Putan, avoik ulo marlo.


“Kitem zalem re baba?”, Bhitorlean, avoicho vichar.


“Maim, pai melo ghe”, ovkoldadd (wisdom tooth) yeunk naslolea putan mhontlem..

“Kitem?”, kuznant nustem sap kortolem Katarin, bhendak aslolea tuvaleak hat puxit bhair ailem.


“Maim, ho poi, madachea muddant poddun pai mela.”


“Avois, Saiba bhogos, hea daddleachem sodanchem”, vhoddlean boddboddun Katarin, ghorkara sorxim dhavun ghelem. Sorean lass zaloli tachi poristithi pollelear to jivo kivam mela hem somzupak, inosent putak gomunk naslolean, bapui mela oxem taka dislem.


“Are bebddea, utth. Jivak sonsonam titlo kiteak piyeunk zai? Gara lagim poddlo mhunn, amchea putan polelo. Nam tor pois rostear poddlolo zalear, eklech Devak khobor. Mottori voilean vochun nas zata aslo.”


Bebddea ghorkarache tras, Katarinank sodanche zaun ghel’le. Vhoir sokoll zatolea noxibache tagdder boroilolem asta, tovui ek kazari jivitacho bhag zaun asa mhunn, ghorkarachi bebddikai taka somzotali. Ek-ekdam taka, tachi tiddok yetali. Punn kitem kortolem? Sotve ratri boroilolem tench favta. Maddache muddant poddlolea ghorkarachea hatak dorun ubarlo, ani apleachea khanddar marun ghorant bhitor velo.

Bebddo Caitan, Katarinacho ghorkar; ek dis kamak gelear, tin dis tank full korun soreache nosar bhonvtalo. Bolsak burak zatoch, porot kamank vetalo. 


Ek dis sokalli, Katarin aplea ghorkarak utthovpak gelem. To utthona zalo. Katarinan villapun kiloch marli. Hoi! Tornnech pirayer Caitan ho sonvsar soddun gelo. Babddem Katarin vidva zalem. Puta khatir tannem dusrem logn korunk naslem. Koxttantlean tannem aplea putak xikoun, vhodd kelo.


Oslim kitlim Katarina amchea Goyant astolim, sangonk zaina. Anik kitle bebdde Caitan asat fokot Devak khobor. Osleo ghorkani, bhitorle bhitor fugar zaun ghorkarachem dukh sonstat. Thoddea bebddeanim, ghorkarnichem bhangar soreachea fattlean, vikun khobar kelam.

Soro jivak kitlo boro vo vaitt hem tor sogott zannant.  Sorea vorvim monis ek piso koso zata. Tachi tokli cholona.  Survatek soro social drink koxem chalu zata ani uprant sovoimyecher poddtoch, tatuntlo bhair sorunk kustar zata.


Bharotacho Bapuji M.K. Gandhi oxem mhontale, “Alcohol is not the answer to all the questions”.  Bebddikai ek duens. Adle kallar fokot daddle vhoddil soro piyetale. Punn atam ostoreo, tornattim chedde cheddvam, soro gottunk xikleant.


Aiz kal doria deger, songit utsov chodd zatat. Poryotonnachea nanvan tea zagear vochon, soro pivunk ani vikhallim vokddam gheun zaitim tornatim vaitt rostear pavleant. Tancho porzollit fudar khabar zait veta.  Aiz kitli, tornattim soro piyelolim distat. Khanavollint jevnnank gelear, ek cocktail ghevop, hem ek unchlem kam’, oxem tim sozmotat.


Konnache partiek gelolo thoinsor, ek khaxelo bapui aplea tornattea putak horan vichartalo “Son, can I make a drink for you?” Wow! Putak soreachi sovoim korunk bapaik horr dista kai? 


Avoi-bapaicho kaido bhurgeancher koddok xistichi nodor dovorunk. Zata title sorea sorxilim tankam pois dovorunk. Odik korun vaddtolea putancher. Ani oxem kelear, Katarinant sonslolem dukh sonspi, thoddim zait !!!

 



Mars 7, 2014


[Lino B. Dourado ani Gaspar Almeida, www.goa-world.com hankam dhinvasun].