Konkani Kotha:
Jiv Jivit
Jie
- Boroupi: Norman Noronha 
Dis Sukrar.
sokallchim sumar 11.30 zalolim. Futbollacho khell somptoch nitt Kuwaitche
igorjexim dhavim dhavim vochun, mhoji vatt polloun ravtole dhuvexim vetana,
sari neshun aslole eke zantte ostorek igorjichea bhailea rostea vatten ubi
asloli poloili. Ticho sobhav gaborlolea porim distalo. Hevtin-tevtin
pollevn konnank tori ti sodtali. Ekdom bhiyelolea porim disli. Mhaka tiche
churchure disle. Tichea lagsar vochun hanvem mhontlem:
“Excuse me, can I help you?”
“No English” tinnem sanglem. Tika inglez sozmonasli.
Tichea nhesnnam vorvim ani
kuddicho rong ani kat polloun ti Gõykar kivam Mungllurkan zaunk zai. Mhozo
dubav pois korunk hanvem Konknnileant vicharlem.
“Tum kosle tori oddchonenk sampodlea. Konnank tori tum sodta?”
Hanvem donuch proxn kel’le. Tinnem ladain suru keli.
“Mhoje dhuve ani zanveam barim hanv misak ailelim. Mis sompun bhair sortoch tim luttint nanch zalim. Hanv tankam sodtam.”
“Bhienaka mai”, hanvem dhir diun mhuntlem ani fuddem vicharlem. “Tuje lagim, tancho fon number asa?
“Hoi re baba”, tichea dhuvechem nanv ani mobile number aslolo ek kagttacho kuddko mhojea hatant tinnem dilo. Ani hanvem, mhoje mobilar ankdde damble.
Hello! Is this Filomena?
Yes! This is Phil here”, tichi mottvi zap. Tichi avoi tika igorje lagim sodta
mhunn hanvem tika kollit kortoch, ti fonar tidkeli.
“Kitem sangta gi! That silly woman…., we told her to wait outside the gate yar…. Because she was not seen for some time we just came to the nearby Souk re…. And see this lady. Who’s taking her away? We’ll be back in a minute. Let her stay there.”
“Tum hanga kiteak ailolo baba?”, tinnem vicharlem.
“Hi poi mhoji dhuv. Lambchea kensachea cheddva lagim gozali korta. Tika vorunk ailolom”.
“Pai bhaxenuch dista”, tinnem mhontlem.
Ponn sogott amchi dhuv avoy bhaxen dista mhunn sangtat. Ghoddie hea zantalen
mhaka "pomp" marunk mhontlem kai? Hem monant goloitana tinnem anik ek proxn kelo.
“Baba, tumi Gõyant khuichea ganvchim?
“Ami Modgavchim. Tum kednai tori Gõyant paulea.” Tichea vicharak zap ditana hanvem vicharlem
“Hoi, hanv ankvar astana Dezembrache mhoineant Saibache festak ailolim. Ami mullachim Gõykaram baba. Ponn zaiteo pillgio fattim, amche purvoz Mungllur gelole te, porot yevunk nam”, tinnem sanglem.
“Poile pavtti Kuwait ailea mhunn tunvem sanglem. Koxem laglem tuka Kuwait?
“Gelea sukrara ratchi hanv Kuwait paulim, Ghara vetana thoddem vatavoron gadientlean poilem. Tea rati flatant bhitor sorlolim tim aiz bhair sorleam!”
“Khorem ghe. Hangasor konnak vell asona. Sogott kamant asta.
“Baba, tuji ghorkarn na hangasor? Ti misak ievunk nam?
“Tichea jivak borem disona mhunn ti aiz ievunk nam”.
“Sozmolim. Ghara pavtanch tuka ani tumche dhuvek boro nosto mezar toyar astolo”.
“Nam mai. Nosteachi bondabost korunuch ghara ieo mhunn sanglolem asa”!
“Hench mhaka borem lagona hangasor. Amger anik kitem? Mhozo zanvoim sokallim utton cha korta ani uprant mhoji dhuv zagi zata. Mhaka sonvoim sokallim utpachi. Dadlo monis cha korta tem mhaka pollevnk borem disona. Hanv kortam mhollear, naka mhonnta. Magir to kamak vetoch mhoji dhuv khativeli utt’ttha. Tichi dhanvpoll vegin nhessun ani fon ailear, eke hatant fon zalear dusrea hatant chayechem kop. Eka zagear bosun cha piyeunk mhunn vell asa? Huh?? Ken’nai chayechem kop hatant ghevun bhair sorta. Oxem kiteak kai mhunn vicharlear. Apleak gadient pieupachi sovoi asa mhonnta. Zanvoi donparcho jevnanak ghara ieta ani porot kamank veta. Sanjer dhuv gharant pavchea adim buk ghevn tuitionank natram toyar asta. Kopdde kaddinastona bhurgeanchem lisanv chalu zata.”
“Ponn, mon’xan aplea jivachem ani bholaikechem pollevnk zai. Disbhor poixea
fatlean dhanvtat.
Mhojea lagin ulounk pasun tamkam time nam. Ken’nai offisant savn fonacher uloita tem zalem. Hanv ratchim niddonk vetoch zanvoim gharant bhitor sorta. To, sanjecho Part Time kam’ korta. Ek sot. Hea zhoddichea fattlean dhanvtam-dhanvtam tannim Mungllur ek boro bonglo bandla. Mungllur xarant halinch ek dukan ghetlam. Tache poixe farir korunk, tim voir sokol zatat. Ani zannai baba….”
Mhojea lagin ulounk pasun tamkam time nam. Ken’nai offisant savn fonacher uloita tem zalem. Hanv ratchim niddonk vetoch zanvoim gharant bhitor sorta. To, sanjecho Part Time kam’ korta. Ek sot. Hea zhoddichea fattlean dhanvtam-dhanvtam tannim Mungllur ek boro bonglo bandla. Mungllur xarant halinch ek dukan ghetlam. Tache poixe farir korunk, tim voir sokol zatat. Ani zannai baba….”
Fuddem kitem tori sangunk vocho. Ek Toyota Camry 2012, modelachi gaddi, amchea fuddeant thambli. Dhuv ani zanvoim mhunn zanttelen mhaka kollit kelem. Dhuven, gaddient bosak tika isaro dilo. Mhojea upkar attoun, ti gaddient bosli. Gaddiecho eccelerator petrolak ugto zatoch, khinna bhitor gaddi pois zali…..
Ponn, nigteach tea zantte ostoren uloilolim utram, u-turn marun mhojea fuddeant thamblim. Hoi! Amchea jivitant, aicho dis bore khuxen sarunk; vellantlo vell kaddunk ami visortanv. Aichea disa, Devan amkam pormollit fulam dileant tancho pormoll ghenvchea poros, fuddem amche jivitant khantte ietle te koxe kaddche, tem ami chodd evjitanv. Odhik korun, amchea burgeank amcho molladik vell diunk ami visortanv. Sonvsarant kosleim kam tum kor, ponn tujea kamacher tuka gorv (pride) asunk zai. Hea toren, tum; tujea jivitak nhoi, ponn somazantui kitem borem korunk xekta.
Tor konnak ravtai??? Apunn anik matso girest zatoch khuxall zatlo, vo ek bore vhoddlem motor ghetoch khuxall zatolo, vo Gõyant voson ek boro dhonddo suru kortoch khuxall zatolo? Oxe chintinaka. Aiz kitem asa tacher khuxall ravunk tozvit kor. Poixeanchi goroz sogleank. Ponn te poixe zhoddunk, tujem jivit khobar korinakai.
Nimane itlench magtam.
Jivit hanson, khellon ani mouzen sarun fuddem
vosot rav. Ani tuka orthi khuxallkai favli tor, ugddas dhor;
mhojea hea lekacho JIV, JIVIT JIE…
http://normannoronha.blogspot.com/2013/06/konkani-kotha-jiv-jivit-jie.html
www.goa-world.com
The First Online Konkani Music Station - Started on March 14, 2000 by Ulysses Menezes and Gaspar Almeida, Goans based in Kuwait. http://www.live365.com/stations/61664
