Naka Saiba! Puro Gha Bosicho Proves!

 

 

KONKANI KOTHA:

Naka Saiba!  Puro Gha Bosicho Proves!

Boroupi: Norman Noronha

Gelea Jun-ache mhoinant hanv Gõy suten gel’lom. Julyacha 8^ver mhojea ixttacho vadd-dis aslo.  Bhurgeponnantle ixtt ami. Navelim Rosary Iskolant xiktana ixttagott amchi. Aiz 25 vorsam odhik zalim samballun dovorlea.

“Norman, he pavtti ami dogui Gõy asat. Mhonntoch tum mhoje vad-disak yevunkuch zai. Ham!!!”.

“Polletam”, hanvem thoddobhov na pavpacho dubhav dakhoun mhonllem.

“Na, na. Hanv aikopak kosoch toyar na“, tannem jit dorli

“Ok baba yetolom ani ghorchankui haddtam. Birthday-cho boroch fodoll ghalumya”,

Mhojea ixttak zap dil’li ti aikun mhoje dhuven mhaka sanglem. “Papa hanv yena. Tumi soglim vhaddlelim. Tumi tumche out of fashion gozalini gul’l zatolim. Mhaka sangat (company) diupak konn na. Tumi vochat. Hanv xamaim fuddem rautam”

Ixttacha zolm disa vochunk hanv ani mhoji ghorkarnn Activa skuttor ghevn bhair sorlim. Navelim thavn bhair sortana vattavoronn borem aslem, punn Moddganv pautat mhonnosor matso pitti-pitti korun pavs zoddunk laglo. Toxinch fuddem gelim. Moddganvcha pornne bazarant pavlolim. Mollbar datt kupamni boroch kallok kelo. Hem fokand borem vochpachena. Ghorkanink sanglem pavsachi jaket choddovpak. Skuttor vatter bond korun hanvuim jaket choddoytalom. Punn pavs aikota? Ghossss korun pavsachem khup amcher vonklem. Portean skuttor chalu keli, punn bike choloupak fuddem disona zalem. Motte-motte pavsache thembe bhale koxe dolleant toptale. Tosech dolle bond korit ami Kadamba bos standdar meren pavlim. Mon matxe kachabul zalem. Porot ghora ghelar, ixttt ragar zatolo dekhun, skuttor thoinch park korun ami bosin proves korpachem chintlem. Nimnno bosint kedna boslolo to ugddasuch na. Dogaim bos stenddar gelim. Vaskuchi bos khuim ubi asta tivui khobor na. Itlyan ek lamb voll polloyli. Shuttle service mhonn aikolem, tache khatir hi voll pasenjeranchi ghoddie zait. Punn ek. Vollik konn ubo rautolo??? Itlyan Vasku….Vasku….Vasku…mhonnon avaz zalo. Bos nigtich vattek laglolli. Hech bosir choddlyar borem mhunn ami dogaim bosir choddlim.

“Arre baba, khali kursi asa re bospak?” havem kondoktorak vicharlem

“Hoi…Hoi.. choddat vegim” tannem sanglem

“Amkam Chikle denvonk zai”, hanvem kondoktorak sanglem.

“Chodd mhonttlam nhoi hanvem!” tikxelelea tallean kondoktoran avaz kelo

Hanv ani mhoji ghorkarnn bosir choddlim. Bos chaluch asli. Aka-taka dopke di-it fattlean bosunk kursi asa kai mhunn pollounk hanvem bosiche vhoilea handelak hat ghatlolo. Kitem sangum? Danddo asa punn ekui handle naslem.

Bos suru zaun Nuvem pauta mhonnosor waka! waka! kanar sadlem, Arre!  Ami asat bosint ani Shakira khuim savn ailem? Fattim vollon polloyt zalear konnem mobile phone ukllun haloooooo mhonttlem. To mista tacho latest ring tone. Bos matxe fuddem pauli. Carmel kolejiche samkara, bouch sundor cheddvam bosik rautalim tem havem polloilem, Bos matxe soukas zali. Atam him cheddvam choddtolim bosir. Oso havem monant vichar kelo punn zalem kitem? Drivoran tanche bogler pautanch bos vegan ghevun gelo. Havem chotrayen kondoktorak vicharlem

“Arre hi lokal bos ani tankam kiteak bosir ghevunk nant? Rath zaunk pavlea Cheddva tim” Kondoktoran kitem zabab dilo zannai? “Arre sodd khobor tanchi. Kolejichi cheddvam sovai tim. 10 rupiank don meuta”

Atam tumi vaitt somzu nakat ham! Hanvuim poilo somzunk na tacho orth kitem aslo to. Uprant sozmolom. 10 rupiank 2 mhonnchem, bosin proves korpak iskolacha ani kolejicha bhurgeank ordi tiket. Mhonntoch 10 rupiancha pasenjaracho zago dog bhurgim ghetat. Lukson nhi hem? Tanche kodde student identity card asa anik tankam ordhi ticket lagta mhonntoch tankam ghevunk nant. Hi onit (injustice) zali nam?

  Bos fuddem Agnel Ashram-a lagim pavtoch thoinsorui chedde ani chedvam misoll bosichi vatt polloun aslim punn bosi drivoran Carmel kolejixim kel’lem natok toxich bos soukas keli itlyan teg mosti chedde gollov marun bosiche darar choddle ani dusrim ordhe tiketticha  bhurgeank thoinch soddun  bos fuddem geli. Itlyan motto paus suru zalo. Hanvem veg-vegim zonel bond korunk mhunn hath ghatlo. Punn kitem sangum? Dukoltalom tem zonel koxench fuddem vochona zalem. Pausache azodden ami ordim bhizlim. Havem ghorkannik sanglem. Ordem ang sukem asa tem samballunk tori ubim raulear borem mhunn ami soroll ubim raulim. Punn don payem dovrun ubem raupak zago naslo, kiteak, bos chik’kar bhorloli asli. Ami toxinch luttint lutt mhonttat tea bhaxen dedd (1 ½ ) payar ubim raulim. 

Fattlea darar bos klenner aslo. To pasenjerank fuddem voch fuddem voch mhonnttalo zalear fuddle darar kondoktor aslo to passenjerank fattim voch fattim voch mhunttalo, Bosint ube aslole pasenjer latant tarle bhortat toxe chik’kar bhorlele asle ani svas (breath) ghevunk pasun varo naslo.  

Saiba bhogos! Mhoje ghorkanin fugar zalolea tallean suskar soddlo. Itlya mhonnosor eke ostoren avois!!!….mhonttlem Konn ek pasenjer denvonk fuddem sortana ticho paym chid’ddilo dista. Don-char gallyo-fosti sovllea uprant mhaka kol’lem ti ek nistekarn mhunn. Bosiveli denvtana anink don-char galli ghalun hatant aslolo pantlo paym chid’dilleacha kodd’dear marpak ti mat visrunk na.

Bos fuddle chalik lagli. Zonelantlyan havem bore panchvi-char dhekave pollele. Kai borim xettam, dakttyo khoddyo tantunt dovem ful udok vhanvtalem. Kamerim xeth vomptalim. Va-re-va. Kai borem amchem sundor Gõy. Skuttorin poinn (travels) kortana hem sogllem pollevnk ani vakannunk khuim mellta? Vatter ek dakttulem tollem aslem. Pausache disani borench udkan bhorlolem. Ek zothkaxi (ghoddie zait) niktench zotache soddlole aple boilank udok naddoitalo……….Wow kitlem sobit amchem Gõy. Kiteak mhunn amche Gõyche  fuddari nopoit kortat kai?

Sumar pavni eka voran bos Chikle pauli. Condoktoran Chikle denvpacha pasenjerank ugddas kelo. Kedna kai Chikle pavun zal’lem. Ami dogaim sottatosott bosivelim denvtana  barobor mhonttlem   “Naka Saiba! Puro zalo to bos Proves!”

GULF-GOANS e-NEWSLETTER (since 1994)  

      

www.yahoogroups.com/group/gulf-goans/   http://www.goa-world.com/